Əməkdar artist Novruz Qartal Azərbaycan Dövlət Akademik Musiqli Teatrında işləyir. Onun səhhətində yaranan problemdən xəbərimiz var, teatr rəhbərliyi də lazımi diqqəti və dəstəyi göstərir. Mədəniyyət Nazirliyinin kollektivi adından dəyərli aktyorumuza Allahdan şəfa diləyirik.

ONN media  xəbər verir ki,bu barədə Axar.az-ın sorğusuna cavab olaraq Mədəniyyət Nazirliyinin Mətbuat Xidmətindən bildirilib. Əməkdar artistin xanımı Zərqələm Əliyevanın 42 ildir kirayədə qaldıqları, acınacaqlı vəziyyətdə yaşamaları və hazırda da aktyora yardım göstərilmədiyi barədə sözlərinə cavab olaraq nazirlikdən qeyd edilib:

“Təəssüf hissi ilə bildiririk ki, sənət adamlarının sosial təminat məsələlərinin, eləcə də mənzil problemlərinin həlli Mədəniyyət Nazirliyinin imkanları xaricindədir. Biz uzun illər bu sahədə çalışan, zəhmət çəkən insanların əziyyətini imkan daxilində qiymətləndirməyə çalışırıq. Siz də bilirsiniz ki, hazırda kirayədə yaşayan, səhhətində problem olar bir çox sənətçimiz var. Onu da diqqətinizə çatdırıq ki, Novruz Qartalın uzunillik fəaliyyəti dövlət tərəfindən layiqincə qiymətləndirilib. Belə ki, o, 2013-cu ildə Respublikanın Əməkdar artisti fəxri adına layiq görülüb, 2015-2018-ci illərdə Prezident mükafatı alıb”.

Qeyd edək ki, Novruz Qartal bağırsaq xərçəngindən əziyyət çəkir. Aktyor hazırda xəstəxanada yatır.