Ukrayna bütün mümkün formatlarda və platformalarda müharibəyə son qoymaq üçün danışıqlara hazırdır.

ONN media xəbər verir ki, bunu ölkə prezidenti Vladimir Zelenski Münhen Təhlükəsizlik Konfransında çıxışı zamanı deyib.

"Paris, Berlin, Minsk. İstanbul, Cenevrə, Brüssel, Nyu-York və ya Pekin - Dünyanın harasında Ukraynada sülhə razılaşdığımız mənə maraqlı deyil. Dörd ölkənin, yeddi və ya yüz ölkənin iştirakı ilə fərqi yoxdur. Əsas odur ki, onların arasında Ukrayna və Rusiya da olsun”, - deyə Zelenski bildirib.

O qeyd edib ki, təkcə Ukraynada deyil, dünyada sülhə, eləcə də beynəlxalq səviyyədə tanınmış sərhədlər daxilində bütövlüyün bərpasına ehtiyac var. 

"Və ümid edirəm ki, heç kim Ukraynanı Qərblə Rusiya arasında əlverişli və əbədi bufer kimi düşünmür. Bu baş verməyəcək, heç kim buna imkan verməyəcək. Əks halda, sual yaranacaq - növbəti kim olacaq? NATO ölkələri hər birini müdafiə etməyə məcbur olacaqlar. Mən inanmaq istəyirəm ki, Şimali Atlantika Müqaviləsi və 5-ci maddə Budapeşt Memorandumundan daha təsirli olacaq”, - deyə prezident bildirib.