Yaponiyanın ən böyük dəmir yolu şirkəti “East Japan Railway Co” mart ayında ölkədə hidrogenlə işləyən ilk qatarın sınaqlarına başlayacaq. 

ONN media  xəbər verir ki, bu barədə “Bloomberg” məlumat yayıb. 

Bildirilib ki, Yaponiyanın hidrogenlə işləyən ilk qatarının 2030-cu ildə kommersiya nəqliyyatı üçün istifadəyə verilməsi planlaşdırılır. 2 vaqonlu “Hybari” qatarı Yaponiyanın nəhəng Şərqi Yaponiya Dəmiryolu şirkətinin “Toyota Motor” və Yaponiyanın “Hitachi” konqlomeratının əməkdaşlığı ilə hazırlanıb. Qatar 4 milyard yen (35 milyon dollar) dəyərindədir və tək bir hidrogen çəni ilə saatda 100 kilometr sürətlə 140 kilometrə qədər yol qət edə bilir. Dəmiryolu şirkəti dizel parkını hidrogen qatarları ilə əvəz etməyi, həmçinin onları ixrac etməyi planlaşdırır.

Yaponiya daha əvvəl 2050-ci ilə qədər karbon neytral olmaq planlarını açıqlamışdı. Hidrogen təmiz enerji mənbəyi olduğu üçün bu məqsədə çatmaqda əsas elementə çevrilmişdi. Yaponiyanın avtomobil istehsalçısı “Toyota” şirkəti hidrogenlə işləyən “Mirai” avtomobillərinin istehsalını 10 dəfə artırmaq niyyətindədir, “Iwatani Corp” kimi enerji şirkəti və “Kawasaki Heavy Industries Ltd” hidrogenin qiymətini aşağı salmaq üçün onun logistikasını optimallaşdırmağa çalışır. Hökumət 2050-ci ilə qədər hidrogen istifadəsini 20 milyon tona çatdırmağı qarşısına məqsəd qoyub.

Qeyd edək ki, Almaniya hidrogen dəmir yolu nəqliyyatı sahəsində qabaqcıl ölkədir. 2018-ci ildə isə Fransanın “Alstom SA” şirkəti hidrogenlə işləyən ilk qatarı işə salmışdı. “Alstom”un rəqibləri İspaniyanın “CAF”, Almaniyanın “Siemens” və İsveçrənin “Stadler” şirkətləri də Avropa üçün yeni hidrogen qatarı modelləri hazırlayırlar.