Ukrayna Silahlı Qüvvələrinin bölmələri Rusiya işğalçı qüvvələrinin arxa infrastrukturuna sarsıdıcı zərbələr endirib.

ONN media  xəbər verir ki, bu barədə Ukrayna Silahlı Qüvvələrinin Baş Qərargahının məlumatında bildirilib. 

Qeyd olunub ki, Ukrayna xalqının işğalçılara qarşı qəhrəmancasına qarşıdurmasının 19-cu günündə Ukrayna müdafiə qüvvələrinin vəziyyəti, mövqeyi və hərəkətlərinin xarakteri əhəmiyyətli dərəcədə dəyişməyib.

“Ukrayna Silahlı Qüvvələri işğalçılar tərəfindən müvəqqəti işğal olunmuş Ukrayna ərazilərində düşmənin maddi-texniki təminatı sistemini sıradan çıxarmaq üçün arxa infrastruktura (sahə bazaları və anbarlar - red.) sarsıdıcı zərbələr endirib. İşğalçı qoşunlar irəliləyişin bütün istiqamətlərində hücum əməliyyatı keçirməkdə ciddi uğur əldə edə bilməyiblər. İşğalçıların əsas səyləri əvvəllər işğal olunmuş xətlərin təhlükəsizliyinin təmin edilməsinə və saxlanılmasına yönəlib”, - deyə məlumatda deyilir.

Bildirilib ki, son sutkada Rusiya Silahlı Qüvvələrinin 4 təyyarəsi, 3 helikopteri məhv edilib: “Qarşı tərəf heç bir istiqamətdə ciddi uğur qazana bilməyib. Rusiya Silahlı Qüvvələrinin əsas səyləri işğal olunmuş ərazilərdə möhkəmlənməyə sərf edilib. Onların silah və hərbi texnika təminatı üçün mülki obyektlərdən, o cümlədən dini yerlərdən istifadə etdiyi aşkarlanıb. Qarşı tərəfin mənəvi-psixoloji durumu aşağıdır. Beləliklə, Rusiya hərbçiləri komandanlığın əmrlərini icra etrməkdən boyun qaçırırlar”.

Rəsmi informasiyaya görə, Belqorod Hərbi Komendantlığının hərbi düşərgəsi Rusiya ərazisindəki Belqorod şəhərində yerləşir: “Düşərgədə yaralanmış əsgərlər var. Onların bəziləri yenidən döyüşlərə qatılmaqdan imtina edirlər”.