“Azərbaycan Dəmir Yolları” QSC sabahdan Bakı-Gəncə sürət qatarının hərəkətini bərpa edəcək.

ONN media bildirir ki, qatarda 9-u birinci klass yeri, 62-si biznes yeri və 296-sı isə standart yer olmaqla, cəmi 367 oturacaq yer mövcuddur. Gediş haqqı standart yerlər üçün 20 manat, biznes yerlər üçün isə 33 manat təyin olunub.

Qeyd edək ki, Bakı-Gəncə istiqamətində sürət qatarının hərəkətinə start verildiyi zaman gediş haqqı standart yerlər üçün 15 manat, biznes yerlər üçün isə 50 manat təyin olunmuşdu. 

Birinci klass yerlər üzrə gediş haqqı isə dəyişdirilməyərək 100 manat məbləğində saxlanılıb. 
Digər məsafələr üzrə də standart yerlərin qiymətində artım, biznes yerlərin qiymətində azalma müşahidə olunur.

Qeyd edək ki, qurum da beynəlxalq məsləhətçi şirkətlərin maliyyə dayanıqlılığının təmin edilməsinə dair tövsiyələrinə uyğun olaraq Bakı-Gəncə sürət qatarı üçün gediş haqlarını dəyişdirdiyini bildirib.