Ötən ilin 29 dekabr tarixindən etibarən Bakı-Gəncə sürət qatarı fəaliyyətdədir. Qatar vaqonları “Stadler” şirkətinin istehsalıdır. Sərnişinlər VIP və biznes sinif vaqonları ilə yanaşı, ekonom vaqonlardan da istifadə edə bilirlər. Hər bir vaqon kiçik mətbəx, soyuducu və simsiz internetlə təchiz olunub.

 

Bakı-Gəncə-Bakı sürət qatarı ayın cüt günlərində Bakıdan, tək günlərində isə Gəncə şəhərindən saat 09:00-da yola düşür. Qatarın Biləcəri, Yevlax və Goran stansiyalarında dayanacaqları mövcuddur. Dörd vaqondan ibarət qatarda birinci klass (9 yer), biznes (62 yer) və standart (296 yer) olmaqla, cəmi 367 oturacaq yeri var. Gediş biletləri dəmir yolu kassalarında və internet saytında onlayn satılır.

 

Azərbaycanda ilk dəfə sürət qatarının işə düşməsi sevinclə qarşılandı. Qatarın Gəncəyə ilk çatdığı gün izdiham yaşanıb, konsert proqramı təşkil edildi. Müxtəlif ictimai şəxslər, qəzet redaktorları qatarla bağlı təəssüratlarında layihəni yüksək qiymətləndirdilər. Onlar bu qatarı gələcəyin qatarı adlandırdılar.

 

QSC-nin açıqladığı məlumatda qeyd etdi ki, qatarın sürəti getdikcə qaldırılacaq. Hazırda sürətin aşağı olmasının səbəbi kimi yollarda tamamlanmayan işlər əsas gətirildi. Qatarda standart yerlərə gediş haqqı əvvəl 15 manat təyin olunsa da, sonradan bu, 10 manata endirildi. Eyni zamanda müxtəlif zamanlarda kampaniyalar təşkil olunaraq, birinci klass üçün qiymətlərdə endirimlər edilir.

 

Bütün bu komfortun yaradılması fonunda ictimaiyyətdə təkliflər səsləndirilir ki, qatar ölkənin Qərb sərhədlərinə qədər uzadılsın. Konkret olaraq fikirlər var ki, Bakı-Gəncə qatarı Ağstafaya qədər gedərsə, insanlar bu yenilikdən daha çox faydalanmış olarlar.

 

ONN media xəbər verir ki, məsələ ilə bağlı iş adamı, “Hilal” İctimai Birliyinin sədri Arzuman Abdulkərimov da sosial şəbəkədə status yazaraq, təklifini bildirib. O, aşağıdakıları qeyd edib: “Gəncədən Bakıya gəlirik. Düşündük ki, sürət qatarından istifadə edək. Yanılmamışıq, çox gözəl və komfortlu, qiymətlər uyğun, xidmət isə yüksək səviyyədədir (wi-fı çıxmaq şərti ilə).

 

Ümumiyyətlə, insaf naminə deməliyəm ki, Cavid Qurbanov “Azərbaycan Dəmir Yolları”na rəis təyin ediləndən sonra bu sahədə çox güclü irəliləyiş var. Amma çox təəssüf ki, bu sürət qatarı Gəncəyə qədər hərəkət edir. Qazağa tez-tez gedib gələn insanların adından həm prezidentimiz cənab İlham Əliyevdən, həm də hörmətli Cavid müəllimdən xahiş edirik ki, sürət qatarının ən azından Ağstafaya qədər hərəkət etməsi üçün göstəriş versinlər. Öncədən təşəkkrümüzü bildiririk".

 

“Azərbaycan Dəmir Yolları” QSC-dən bildirilib ki, qurumun qeyd edilən istiqamətdə planları var: “Ölkədə dəmir yolu dəyişən cərəyana keçirilir. Bu il ərzində dəmir yolunun dəyişən cərəyana keçirilməsi nəzərdə tutulur. Buna nail olduqdan sonra sürət qatarının Ağstafaya qədər getməsi təmin ediləcək. Yəni bu, planda var və icrası istiqamətində də işlər gedir. Dəmir yolunun texniki imkanları sürət qatarının Ağstafaya qədər getməsinə tam imkan verir. Burada, sadəcə, platformaların yenidənqurulması lazımdır. Dəyişən cərəyana keçdikdən sonra öz qatarlarımız da ikili sistemdə işləyə biləcək”.