Heydər Əliyev prospektinin bir hissəsində yol kənarında səki piyadaların hərəkətində çətinliklər yaradıb.

Prospektin “Azpetrol” yanacaqdoldurma məntəqəsi yerləşən hissəsində səkiyə kafel-mərmər döşənib. Bu isə yağışlı və qarlı hava şəraitində bu yolla hərəkət edən piyadaların hərəkət etməsində problemlərə yol açıb.

Məsələ sosial şəbəkələrdə də tənqid olunub və adıçəkilən tədbirlərin estetik görüntü ilə bağlı olaraq “Azpetrol Ltd” MMC tərəfindən edildiyi bildirilib.

Bununla bağlı Ölkə.Az “Azpetrol Ltd” MMC ilə əlaqə saxladı. Şirkətin İctimaiyyətlə əlaqələr şöbəsi əvvəlcə məsələdən məlumatsız olduqlarını bildirdilər. Daha sonra isə şirkətdən deyildi ki, ərazi YDM-in daxilində deyil və məsələnin onlarla bağlılığı yoxdur.

Nizami Rayonu İcra Hakimiyyətindən isə Ölkə.Az-ın sorğusuna cavab olaraq bildirildi ki, “Azpetrol” sözügedən ərazidə yanacaqdoldurma məntəqəsini açarkən səkiyə kafellər də döşənib: “Aidiyyəti üzrə qurumlara məlumat verdik, həmin kafel yerləri sökülərək sürüşkən olmayan yeni kafellərlə əvəz olunacaq”. 

İcra Hakimiyyətindən həmçinin bildirildi ki, qurum tərəfindən daha əvvəl həmin ərazidə kafellərin dəyişdirilməsi istənilib. Lakin “Azpetrol” görünüşlə bağlı olaraq dəyişiklik edilməsini istəməyib.