Uşaqları dərsə necə həvəsləndirək? - Stresssiz motivasiya yolları

10-04-2026, 15:43

Tədris ilinin son rübü həm şagirdlər, həm də valideynlər üçün ən çətin dövrlərdən biri hesab olunur. Xüsusilə imtahanlara hazırlaşan yuxarı sinif şagirdlərində yorğunluq və motivasiya itkisi daha qabarıq hiss edilsə də, bu hal artıq aşağı siniflərdə də müşahidə edilir.

ONN media xəbər verir ki, yaz aylarının yaxınlaşması və havaların isinməsi ilə uşaqların diqqətini dərsə cəmləməsi daha da çətinləşir, ev tapşırıqları isə çox vaxt gərginlik və mübahisələrlə müşayiət olunur.

Mütəxəssislər hesab edir ki, bu mərhələdə əsas məqsəd uşağın yüksək qiymət alması deyil, onun öyrənməyə marağını qorumaq və özünə inamını zədələməməkdir. Valideynlərin ən çox yol verdiyi səhvlərdən biri qiymətləri uşağın şəxsiyyəti ilə əlaqələndirmələridir. Uğursuz nəticələr zamanı təzyiq göstərmək əvəzinə, səbəbləri sakit şəkildə müzakirə etmək daha effektiv sayılır.

Bildirilir ki, dərs prosesinin düzgün təşkili də motivasiyaya ciddi təsir edir. Məsələn, tapşırıqlara əvvəlcə asan mövzulardan başlamaq, sonra çətin hissəyə keçmək və sonda yenidən daha sadə işlərlə yekunlaşdırmaq uşağın müqavimətini azaldır və dərsə münasibətini müsbətə doğru dəyişir.

Eyni zamanda, istirahət amili xüsusi əhəmiyyət daşıyır. Dərsdən dərhal sonra əlavə məşğələlərə cəlb olunan uşaqlarda diqqət zəifləyir və emosional yorğunluq yaranır. Bu səbəbdən məktəbdən sonra ən azı bir saatlıq fasilə vermək, xüsusilə bu müddətdə telefon və digər elektron cihazlardan uzaq qalmaq tövsiyə olunur.

Mütəxəssislər vurğulayır ki, səhvlərə münasibət də motivasiyada mühüm rol oynayır. Uşağın səhv etməkdən qorxması öyrənmə prosesini ləngidir. Halbuki səhvlər biliklərin mənimsənilməsinin təbii hissəsidir və düzgün yanaşma ilə inkişaf üçün fürsətə çevrilə bilər.

Bundan əlavə, valideyn və uşağın məsuliyyət bölgüsü də düzgün qurulmalıdır. Valideyn dəstəkçi rolunda çıxış etməli, lakin tapşırıqları uşağın yerinə yetirməməlidir. Bu yanaşma uşaqlarda müstəqilliyi və məsuliyyət hissini gücləndirir.

Qeyd olunur ki, düzgün yanaşma ilə tədris ilinin son mərhələsini daha sakit və effektiv keçirmək mümkündür.

ONN İnformasiya Agentliyi