Bu gün bütün ölkə üzrə vətənsevən  gənclər ordusu yetişir Hər bir ölkənin gələcəyi onun sağlam, vətənpərvər ruhda böyüyən, yetişən  gənclərindən aslıdır. Çünki bu günün gəncləri sabahın dövlət idarəçiləridir. Ona görə də gənclərin öz potensiallarını ortaya qoyması üçün dövlət səviyyəsində onlara hər bir şərait yaradılır. Dövlət də eyni zamanda gənclərdən haqlı olaraq onlara göstərilən diqqət və qayğının qarşılığını gözləyir, gənclərin daha da dövlətçi, millətçi, vətənpərvər olmasını arzulayır. Müşahidə etdiyimiz mənzərə ondan ibarətdir ki, gənclər bu etimadı doğruldur, vətənpərvər ruhda böyümək, bu ruhu özündə təcəssüm etdirmək istiqamətində çalışır, fəallıq göstərir. Azərbaycan xalqının ən önəmli tərkib hissəsi olan müasir Azərbaycan gəncləri də bu gün tarixi kökdən gələn mili-mənəvi dəyərlərimizi, doğma ana dilimizi, ata-babalardan qalan gözəl adət-ənənələrimizi göz bəbəyi kimi qoruyub saxlayır, onları yaşadır. Bütün bu sadaladığımızlara verilən dəyər, gənclərimiz tərəfindən onların inkişaf etdirilməsi gənc nəslin vətənpərvərliyindən irəli gəlir. Gənclərdə vətənpərvərlik hissi olmasa, onlar milli-mənəvi dəyərlərimiz, tarixi köklərimiz, tarixi qəhrəmanlarımız barədə öyrənməyə, onlar barədə bilgilər əldə etməy maraqlı olmazlar. Bu gün Azərbaycan gənclərinin müasir, inkişaf etmiş, yüksək intellektli aparıcı qüvvə kimi formalaşmasında birmənalı olaraq, dövlətin apardjğı gənclər siyasətinin mühüm rolu var. Bu siyasətin banisi isə xalqımızın Ümummilli lideri Heydər Əliyevdir.  "Hər bir Azərbaycan gənci hər şeydən çox, hər şeydən artıq ,müstəqil Azərbaycanın bu günü ,gələcəyi haqqında düşünməlidir" - deyən Ümummilli lider 1994-cü ildə Gənclər və İdman Nazirliyinin əsasını qoydu. Gənclərə etibar edən Ulu öndər onlarla ünsiyyətin tərəfdarı idi və gənclərlə mütəmadi görüşlər keçirməklə onların düşüncəsini, fikirlərini və təkliflərini öyrənir, müvafiq addımlar atırdı. Gənclərlə bu cür ünsiyyətin qurulması üçün də ilk dəfə Ümummilli lider Heydər Əliyev 1995-ci ildə gənclərin forumunun keçirilməsi haqqında təklif irəli sürdü və bundan sonra 1996-cı ildən başlayaraq Azərbaycan gənclərinin forumlarının keçirilməsinə start verildi. Ümummilli liderin gənclərə ən ciddi və əsas tövsiyəsi isə onların vətənpərvər olması ilə bağlı idi. Heydər Əliyev gənclərlə keçirdiyi hər bir görüşdə bu məqama xüsusi diqqət çəkirdi.

2003-cü ildən etibarən isə Azərbaycanda gənclər siyasəti daha da şaxələnərək yeni qərarlar fonunda, yeni mərhələyə qədəm qoydu.  "Siz bütün işlərdə mənə arxalana bilərsiniz. Mən də sizə arxalanıram "deyən Prezident İlham Əliyev qərarları ilə Ulu öndər Heydər Əliyevin gənclər siyasətinə sadiqliyini təsdiq etdi. Göründüyü kimi, ölkədə həyata keçirilən uğurlu gənclər siyasətinin nəticəsidir ki, bu gün Azərbaycan gəncləri cəmiyyətin inkişafında fəal iştirak edir, mədəniyyət, incəsənət, iqtisadiyyat və digər sahələrdə nailiyyətlər qazanır, dövlətçiliyin möhkəmləndirilməsi prosesində yaxından iştirak edir, ən əsası vətənpərvər ruhda böyüyürlər. Burada xüsusi qeyd edilməli məqam ondan ibarətdir ki, əyalət, rayon gəncləri də eyni templə inkişaf edir, dövlətə, dövlətçiliyə bağlı olur, vətənpərvər ruhda tərbiyə alır və böyüyürlər.  Dövlətin inkişafında, sosial-siyasi müstəqilliyin qorunub saxlanması, möhkəmləndirilməsi və dövlətçiliyin inkişaf etdirilməsi prosesində Azərbaycanın şimal bölgəsi olan Xaçmaz rayonundan olan gənclər də hər zaman dövlətə, vətənə sadiqlik nümayiş etdirib, torpaqlarımızın qorunmasında yaxından iştirak edərək tarixi nailiyyətlər qazanıblar. Xaçmaz rayonu Yeni Azərbaycan Partiyasının üzvü Aygün Osmanova deyir ki,  ümumilikdə, torpaqlarımızın azadlığı uğrunda Xaçmaz rayonu 250-dən artıq şəhid verib. Onların içərisində 20 yanvar faciəsinin qurbanları, Qarabağ müharibəsində həlak olan həmyerlilərimiz, eləcə də  1988-ci ildə Ermənistanda baş vermiş zəlzələnin nəticələrini aradan qaldırmaq üçün köməyə adam aparan təyyarənin ermənilər tərəfindən vurulması nəticəsində həyatını itirən xaçmazlılar var: "Yaxın tariximizdə,  2016-cı ilin Aprel döyüşlərində də Xaçmaz rayonu şəhid verib. Ümumiyyətlə,  xaçmazlı gənclər dövlətə, vətənə sədaqətlərini, onlara verilən tapşırıqları yüksək səviyyədə yerinə yetirməklə  hər zaman, hər yerdə sübut ediblər.  Əminəm ki, bundan sonra da xaçmazlı gənclər dövlətin gənclər siyasətində daim aktivlik nümayiş etdirəcəklər". Aygün Osmanova qeyd edib ki, yaşadığı rayonda gənclərin vətənpərvər ruhda tərbiyə olunması yüksək səviyyədədir və bağçalardan tutmuş, orta məktəblərə qədər bütün ümumtəhsil müəssisələrində gənclərin vətənpərvər ruhda tərbiyə olunması, bu ruhda böyüməsi istiqamətində lazımı tədbirlər həyata keçirilir Süleyman İsmayılbəyli Azərbaycan Respublikasının Prezidenti yanında QHT-lərə Dövlət Dəstəyi Şurasının maliyyə dəstəyilə ABUİB-in həyata keçirdiyi "Azərbaycançılıq və hərbi vətənpərvərlik ideyalarının təbliği" layihəsi çərçivəsində çap olunur.