Artıq bəzi şirkətlər və qurumlar xüsusi karantin rejimi ilə əlaqədar olaraq ölkədə başladılan "Evdə qal" kampaniyası çərçivəsində əhaliyə dəstək olmaq üçün müəyyən yardımlar və güzəştlər edirlər. Bu şirkətlər arasında mobil operatorların yer almaması isə əhali tərəfindən birmənalı qarşılanmayıb. Məsələ ilə bağlı sorğusuna cavab olaraq "Azercell"dən bildirilib ki, şirkət abunəçiləri üçün bəzi tətbiqlərə müəyyən endirimlər edib: "Azercell" təqdim etdiyi "Busuu" - dil öyrənmə tətbiqində qoşulmaya 50% endirim, "Zvuk" musiqi tətbiqində isə mobil internet trafikindən pulsuz istifadə kampaniyaları təqdim edib. Abunəçilər həmin güzəştlərdən rahatlıqla yararlana bilərlər". "Bakcell"dən isə bildirilib ki, koronavirusla mübarizədə şirkət vətəndaşlara bir sıra yardımlar edib: "Bakcell" Azərbaycana süni tənəffüs aparatları, bədən hərarətini məsafədən ölçən xüsusi keçid-buraxılış avadanlıqları, eləcə də koronavirusa yoluxmanı yerindəcə müəyyən etməyə imkan verən 3000 ədəd ekspress-testin gətirilməsi üçün iri həcmdə vəsait ayırıb. "Bakcell" əməkdaşları bu günlərdə karantin mərkəzlərində çalışan tibbi heyətə təşəkkürünü, karantində olan insanlara isə dəstəyini ifadə etmək üçün açıqca vasitəsilə mesajlar göndərir. Həmçinin, şirkət müəyyən karantin məntəqələrində çalışan tibb işçilərinə 100 manat, karantində olan vətəndaşlarımıza isə 50 manat məbləğində ödəmə kartları göndərib. 22 mart tarixindən etibarən "Bakcell" abunəçiləri öz telefonlarının ekranlarında “Evdə qal” çağırışını görürlər. 1542 qaynar xətt nömrəsinə zənglər də bütün "Bakcell" abunəçiləri üçün pulsuzdur. Həmçinin, şirkət öz abunəçilərinə xüsusilə vacib olmadıqda, Müştəri Xidməti Mərkəzlərinə getmək əvəzinə “Mənim Bakcellim” tətbiqetməsindən istifadəni və ya 555 Əlaqə Mərkəzinə zəng etməyi tövsiyə edib. Qeyd olunan tədbirlərlə yanaşı "Bakcell" şirkəti abunəçilərimiz və bütün ölkə vətəndaşlarımızın sağlamlığına töhfə verə biləcək digər mühüm layihələr üzərində işləyir və bu layihələr barədə ictimaiyyətə ətraflı məlumat veriləcək". Qeyd edək ki, sözügedən sorğumuzla əlaqədar "Nar"a etdiyimiz müraciət cavabsız qalıb.axar.az