Azərbaycanda qeydə alınan pozitiv koronavirus faktlarının 20%-i Rusiyadan gəlmədir. ONN media  xəbər verir ki, bu sözləri Nazirlər Kabinetinin yanında Operativ Qərargahın brifinqində Azərbaycan Respublikası Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev deyib. H.Hacıyev bildirib ki, Samur keçid məntəqəsində toplaşan azərbaycanlıların sosial mediada yayılan görüntüləri qəbuledilməzdir: "Rusiyada müvəqqəti əsasda yaşayan vətəndaşlarımızın ölkəyə gətirilməsi və geri qaytarılmasını növbəli şəkildə həyata keçirmək üçün portal yaradılıb. Bu portalın adı " Evə gedirəm" portalıdır. Rusiyada yaşayan vətəndaşlarımız bu portalda qeydiyyatdan keçməlidir. Portal avtomatik olaraq onları sıralayacaq və Azərbaycandakı vəziyyət nəzərə alınaraq onlar ölkəmizə gətiriləcəklər. Portal yaxın günlərdə fəaliyyətə başlayacaq və 5 gün ardıcıl işləyəcək. Daha sonra işinə fasilə veriləcək və informasiya emal olunacaq. 550-yə yaxın Azərbaycan vətəndaşının Rusiyadakı rəsmi qurumlarımıza müraciəti qeydə alınıb. Həmin müraciətlər də onlayn portala yerləşdiriləcək. Rusiyada yaşayan vətəndaşlarımızın fərdi şəkildə sərhəd-keçid məntəqələrinə gəlməsinə ehtiyac yoxdur. Onların növbəlilik prinsipində vətənə qayıtması təmin olunacaq". O bildirib ki, Rusiyada yaşayan vətəndaşlar iki formada ölkəmizə gələ bilər. Belə ki, ölkəyə qayıtmaq istəyən vətəndaşlar üçün quru və su yolu ilə marşurtlar müəyyən ediləcək və növbəli şəkildə gətiriləcək: "Aviasiya yolu ilə gəlmək istəyən vətəndaşlar isə alt sistemdə yerləşdiriləcək və bununla əlaqadar daha sonra açıqlama veriləcək".