Ukrayna dövləti Dağlıq Qarabağı Azərbaycanın ayrılmaz parçası olaraq qəbul edir. ONN media xəbər verir ki, bunu Ukrayna Ali Radasının millət vəkili Rüstəm Ömərov deyib. Deputat bildirib ki, beynəlxalq ictimaiyyət Ermənistanın Dağlıq Qarabağdakı varlığını işğal kimi dəyərləndirir: “Eyni şəkildə, Azərbaycan da Ukraynanın ərazi bütövlüyünü tanıyır. Krımı Ukraynın parçası olaraq görür. Azərbaycan Azov, Qara dəniz və Xəzər dənizlərinin təhlükəsizliyi mövzusunda Ukraynanın ən təbii və əhəmiyyətli əməkdaşıdır”. R.Ömərov SSRİ-nin dağılmasından sonra Azov, Qara dəniz və Qafqaziyada “donmuş” təhlükəsizlik problemləri olduğuna diqqət çəkib: “Azərbaycan, Gürcüstan, Moldova və Ukraynanın dondurulmuş problemləri var və bu problemlər davam etməkdədir”. Krım-Tatar Milli Məclisinin sədri Rəfat Çubarov isə döyüşlərin Azərbaycan torpağında getdiyini və Azərbaycanın 30 ildir ki, Ermənistanın işğalındakı ərazilərini azad etmək üçün savaşdığını qeyd edib: “Dağlıq Qarabağda 3 dəfə atəşkəs elan olunub. Amma hər dəfə 1 gündən uzun davam etməyib. Daimi atəşkəs üçün Ermənistan əsgərlərini Azərbaycan torpağından geri çəkməyə söz verməlidir”.