"Azərbaycan Hava Yolları" QSC-nin (AZAL) prezidenti Cahangir Əsgərov və Pakistanın Azərbaycandakı səfiri Bilal Haye arasında görüş keçirilib. Bu barədə ONN media-ya AZAL-dan bildirilib. Məlumata görə, görüşdə iki ölkə arasında mülki aviasiya sahəsində ikitərəfli əməkdaşlıq məsələləri, həmçinin sərnişin axınının və yük daşımalarının artırılması üzrə perspektiv planları müzakirə edilib. Səfir bildirib ki, 2019-cu ildə 40 mindən artıq Pakistan vətəndaşı Azərbaycanı ziyarət edib və koronavirus (COVID-19), beynəlxalq uçuşlarla bağlı məhdudiyyətlər aradan qaldırıldıqdan sonra bu rəqəm daha da artacaq. O, eyni zamanda Azərbaycan vətəndaşlarının turizm məqsədilə və ticarətin inkişafı üçün Pakistana səyahətə böyük maraq göstərdiklərini də qeyd edib. C.Əsgərov isə deyib ki, birbaşa hava əlaqəsinin açılması iki ölkə arasında turizmin və işgüzar münasibətlərin inkişafına əlavə təkan verəcək. 2020-ci ilin yanvar ayında Azərbaycan və Pakistanın milli aviadaşıyıcıları arasında imzalanmış kod-şerinq sazişini xatırladan AZAL prezidenti beynəlxalq hava əlaqələri bərpa edildikdən sonra, hər hansı məhdudiyyət qoyulmadan, hər iki ölkənin istənilən hava limanına müntəzəm sərnişin reyslərinin həyata keçirilməsini təklif edib. Qeyd edək ki, Pakistanla Azərbaycan arasında birbaşa reyslərin açılmasına tələbat çoxdan yaranıb. Birbaşa reyslər uçuş vaxtını azı 3 saat azaltmağa imkan verəcək, iki qardaş ölkə arasında siyasi, iqtisadi və mədəni əlaqələrin daha da dərinləşdirilməsinə zəmin yaradacaq.