Ermənistan müxalifəti dekabrın 22-də genişmiqyaslı aksiyalar günü ilə yanaşı, ümummilli tətil elan edib.

ONN media xəbər verir ki, minlərlə insan paytaxt İrəvanın Respublika Meydanında toplaşıb.

Etirazçıların əsas tələbi dəyişməz olaraq qalır: Ermənistanın baş naziri Nikol Paşinyanın rəhbərlik etdiyi hökumətin istefası.

Müxalifət milli maraqlara xəyanət etdiyinə və Qarabağla bağlı biabırçı bəyanat imzaladığına görə hökumət başçısının getməli olduğuna əmindir.

“Daşnaksütyun” partiyasının üzvü Geqam Manukyan çıxışında bildirib ki, 2,5 ildən sonra xalq, onsuz da, Nikol adını söyləməkdən iyrənib.

Mitinqlərdə “Nikolsuz Ermənistan” şüarları səsləndirilir.

Etiraz aksiyaları 10 noyabrda baş nazirin Qarabağla bağlı imzaladığı üçtərəfli bəyanata cavab olaraq başlayıb. Müxalifət Paşinyanı milli maraqlara xəyanət etməkdə günahlandırır və istefasını tələb edir.