Cəlilabadda maşında 12 kq heroin daşıyan şəxs saxlanılıb. DİN Mətbuat Xidmətinin Lənkəran regional qrupundan verilən məlumata görə, Cəlilabad RPŞ əməkdaşları tərəfindən Salyan şəhər sakinləri S.Quliyev və Z.Zeynalov sonuncuya məxsus “Chevrolet” markalı avtomobillə saxlanılaraq polis şöbəsinə gətiriliblər. Avtomobilə baxış zamanı oradan 4 bağlamada ümumi çəkisi 12 kiloqram 120 qram narkotik vasitə heroin aşkarlanaraq götürülüb. Araşdırma zamanı məlum olub ki, həmin narkotik vasitəni S.Quliyev xarici ölkələrdən birinin vətəndaşı vasitəsilə əldə edib və həmin şəxsin deyəcəyi yerə qoymaqla ayrı-ayrı şəxslərə çatdırılmasını təşkil etməli imiş. Faktla bağlı araşdırma aparılır.