Binəqədi rayonu Abay Kunanbayev küçəsindəki “Sənan” marketdə satılan “Danette” şirkətinin məhsulu kiflənmiş çıxıb.

Bu barədə Axar.az-a daxil olan vətəndaş şikayətində bildirilib ki, son istifadə tarixi 15 aprel 2022-ci il olduğu halda sözügedən marketdən aldığı “Danette” pudinqi tamam yararsız olub.

Marketdən əməkdaşımıza bildirilib ki, məhsul düzgün qablaşdırılmadığına görə hava çəkib və xarab olub. Vətəndaşa məhsulun pulu geri qaytarılıb.

Azad İstehlakçılar İctimai Birliyinin sədri Eyyub Hüseynov isə saytımıza bildirib ki, eyni halla bağlı quruma çoxsaylı şikayət gəlir:

“Məhsul son istifadə tarixi bitmədən yararsız vəziyyətə düşə bilir. Bu kimi hallar məhsulun saxlanma şəraitinə görə baş verir. AQTA hər zaman xəbərdarlıq edir ki, məhsul istehsal yerindən istehlakçının masasına qədər izlənilməlidir. Daşınması, qablaşdırılması, saxlanılması nəzarət altında olmalıdır. Görünür, sözügedən məhsulun saxlanma şəraiti standartlara uyğun olmayıb. Həmçinin məhsulun istehsal prosesində də nöqsan olduğuna görə bu hal baş verə bilər”.