“Fransa ilə Ermənistan arasındakı silah alış-verişində qanunauyğunsuzluq yoxdur. Ermənistan digər dövlətlərdən silah ala, Fransa da öz növbəsində istədiyi dövlətlərə müqavilələr əsasında silah sata bilər”.

ONN Media xəbər verir ki, bu fikirləri Təhlükəsizlik üzrə ekspert Alparslan İmanqulu bildirib. Ekspertin sözlərinə görə burada ən önəmli məqamlardan biri odur ki, bu gün Ermənistan demək olar ki, tamamilə Rusiyanın himayəsində olan bir dövlətdir:

“Müstəqil qərar verməyə gücü çatmayan bir dövlətin Fransa ilə bu şəkildə ticari əlaqələr qurması, xüsusi ilə də təhlükəsizlik məsələləri baxımından təbii ki, bu narahatedicidir. Demək ki, burada Rusiyanın da öz maraqları var. Çünki birmənalı olaraq Ermənistan ərazisində Rusiyanın icazəsi olmadan heç bir dövlət bu şəkildə addım ata bilməz. Və yaxud da Ermənistanın hərbi idarəetmə rəhbərliyi heç bir şəkildə Rusiyanın hər hansı bir icazəsi olmadan kənar dövlətlərlə bu şəkildə qarşılıqlı silah alış-satışına cürət etməz”.

Ekspert bildirib ki, Azərbaycan üçün bu məsələlər sadəcə məlumat xarakteri daşıyır və bunun əsasında ölkəmiz öz növbəsində lazımi tədbirləri mütləq görəcək. "

Kimin kimə silah satıb-satmaması məsələsinə biz heç bir şəkildə əngəl ola bilmərik. Lakin diplomatik yollarla etirazımızı hüquqi şəkildə bildirmək imkanımız var. Xüsusən də Fransanın silah satması ilə yanaşı, Gürcüstanın hava məkanının da bu istiqamətdə istismar olunmasına Azərbaycan diplomatik yollarla gərəkli təzyiqləri mütləq göstərməlidir.