Bakı şəhər Yasamal rayonu ərazisində yerləşən 286 saylı orta məktəbdə insident baş verib.

ONN Media-nın əldə etdiyi məlumata görə, övladını məktəbə gətirən 1976-cı il təvəllüdlü, Yevlax rayonunda qeydiyyatda olsa da, paytaxtda yaşayan Z.Muradov (şərti) məktəb rəhbərliyini təhqir edib.

Həmin şəxs övladını məktəbə dərsin başlama saatından gec gətirdiyi üçün şagirdi qapıdan məktəbə buraxmayıblar. Bundan sonra valideyn məktəbin qapısının qarşısında oranın rəhbərliyi və müəllim heyətinin ünvanına yüksək səslə qışqıraraq söyüşlər səsləndirib. O, məktəbin iş fəaliyyətinə mane olub.

Məktəbin direktor müavini polisə müraciət etdikdən sonra həmin valideyn saxlanılıb. O, ərazi üzrə Yasamal rayon Polis İdarəsinin 29-cu Polis Şöbəsinə aparılıb.

Daha sonra Yasamal rayon Məhkəməsinə göndərilən şəxs barəsində 8 sutka inzibati həbs cəzası təyin edilib.