Ekologiya və Təbii Sərvətlər Nazirliyi (ETSN) sürüşmə sahələrində vəziyyəti açıqlayıb.

ONN media xəbər verir ki, ETSN-nin Milli Geoloji Kəşfiyyat Xidmətinin geoloji planlama ekspedisiyasının rəisi Əziz Qaralov APA-ya deyib ki, “Teleqüllə” sürüşmə sahəsinin torpaq qatında eni görünən dərinliyi 5-6, uzunluğu 60-70 metr olan çatlar yaranıb, ay ərzində prosesin dinamikasında nisbi aktivlik baş verib.

Onun sözlərinə görə, Zığ sürüşmə sahəsində atmosfer yağıntıları və texnogen amillərin təsirindən nisbi aktivlik müşahidə edilib: “Masazır qəsəbəsində “Zəli gölü” adlanan ərazidə və Nübar qəsəbəsində atmosfer yağıntılarının və texnogen amillərin təsirindən sürüşmə - çökmə sahələrində aktivlik qeydə alınıb”.

Astarada Kijəbə və Miki sürüşmə sahələrinin aktivləşdiyini bildirən ekspedisiya rəisi vurğulayıb ki, Lənkəran-Lerik yolunun 17-19 km-liyi sürüşmə sahəsində atmosfer çöküntülərinin təsirindən yol boyu yamacda bir neçə yerdə yeni uçqun hadisəsi baş verib və bir neçə yerdə yeni sürüşmə sahəsi əmələ gəlib: “Lənkəran-Lerik yolunun 27-29-cu kilometrliyində atmosfer yağıntılarının təsirindən yol boyu yamacda yeni lokal sürüşmə və uçqun prosesləri müşahidə olunub. Lənkəranda Gəgiran sürüşmə sahəsi də aktivləşib və bir neçə yerdə yeni sürüşmə və uçqun hadisələri olub. Masallı-Yardımlı yolunun 13-15, 7-16-24 -26 kilometrliklərində sürüşmə sahəsində aktivləşmə müşahidə edilib”.

Ekspedisiya rəisi qeyd edib ki, Xızı – Altıağac avtomobil yolunun 1-ci km-də, yolun sağ və sol hissələrində bir neçə yerdə çökmə və oturma prosesi qeydə alınıb: “Həmin yolun 11 – 15-ci kilometrliyində sürüşmənin dinamikasında aktivlik müşahidə edilib, uçqun - töküntü prosesləri aktivləşib. Sürüşmə sahəsinin parametrlərində də artım baş verib. Şabranda, Qazbabalı sürüşmə sahəsində aktivlik hələ də davam edir. Quba – Xınalıq avtomobil yolunun 37 -46-cı kilometrliyində sürüşmə aktivləşib.

Bundan başqa, Şamaxı şəhəri 48-A məhəlləsi sürüşmə sahəsində çatların ölçülərində artım qeydə alınıb, sürüşmə sahəsində aktivlik müşahidə olunur. Bakı – Şamaxı avtomobil yolunun 106 - 111-ci kilometrliyinin bir neçə yerində uçqun – töküntü, axma tipli sürüşmə hadisəsi olub, uçqun – töküntü prosesləri aktivləşib. Bakı – Ağsu magistral avtomobil yolunun 132 – 156 – cı kilometrliyində sürüşmə aktivləşib və nəticədə uçqun – töküntü hadisələri baş verib. Yol boyu bir neçə yerdə yeni çökmə və oturma prosesləri müşahidə edilib. Muğanlı – İsmayıllı avtomobil yolunun 2 -11, 23 – 24, 27 – 29 - cu kilometrliklərində atmosfer yağıntılarının təsirindən sürüşmə sahəsinin dinamikasında nisbi aktivlik qeydə alınıb, yol boyu bir neçə yerdə yeni lokal sürüşmə sahələri əmələ gəlib”.