Azərbaycanda bəzi ərazilərdə yeni sürüşmə sahələri yaranıb, bəzi yerlərdə isə sürüşmə sahəsinin təsir dairəsi genişlənib.

ONN media xəbər verir ki, bunu trend-ə Ekologiya və Təbii Sərvətlər Nazirliyinin (ETSN) Milli Geoloji Kəşfiyyat Xidmətinin geoloji planlama ekspedisiyasının rəisi Əziz Qaralov deyib.

Ə.Qaralovun sözlərinə görə, İsmayıllıda Lahıc qəsəbəsinin şimal-şərq hissəsində (Ərəgit kənd ərazisində) eni 120-140 m, uzunluğu 280-300 m olan sürüşmə sahəsi əmələ gəlib. Sürüşmə sahəsi üzərində müşahidə olunan çatların parametrlərində artım qeydə alınıb. Bağəli sürüşmə sahəsi - kənd ərazisində mövcud olan sürüşmə sahələrinin dinamikasında aktivlik qeydə alınıb. Kənd ərazisində eni 180-190 m, uzunluğu 750-800 m və qırılma qaşının hündürlüyü 7-8 m olan yeni sürüşmə sahəsi əmələ gəlib. Qoydan kəndi ərazisində də eni 40-80 m, uzunluğu 150-170 m mövcud olan sürüşmə sahəsinin təsir dairəsi genişlənib.

Mütəxəssis qeyd edib ki, İsmayıllıda Muğanlı-İsmayıllı avtomobil yolunun 2-11, 23-24, 27-29-cu km-ində yolun hərəkət hissəsində kiçik çatlar yaranıb və yol boyu çökmə-oturma prosesləri qeydə alınıb. İsmayıllının Müdrisə kənd ərazisində və Lahıc-Müdrisə avtomobil yolunun bir neçə yerində sürüşmə, uçqun töküntü və yol boyu bir neçə yerdə qabarmalar müşahidə edilib.

Nazirlik rəsmisinin sözlərinə görə, Siyəzən rayonunda Sədan sürüşmə sahəsinin parametrlərində artım müşahidə olunub. Rayonda Qazbabalı sürüşmə sahəsində müxtəlif istiqamətli yeni çatlar əmələ gəlib. Şamaxı rayonunda Şamaxı şəhəri, 48-A məhəlləsindəki sürüşmə sahəsinin parametrlərində nisbi artım qeydə alınıb və çatların ölçüləri artıb. Bakı-Şamaxı avtomobil yolunun 106-111-ci km-də avtomobil yolunun sol və sağ yamac hissəsində mövcud olan sürüşmə sahəsinin ölçüləri artıb. Şamaxıda Cabanı, Dədəgünəş sürüşmə sahələrində prosesin dinamikası aktivləşib. Bakı-Ağsu magistral avtomobil yolunun 132-156-cı km-də sürüşmə sahəsində sürüşmə prosesi aktivləşib və yeni sürüşmə sahələri yaranıb.