Ekologiya və Təbii Sərvətlər Nazirliyinin Milli Geoloji Kəşfiyyat Xidmətinin mütəxəssislərindən ibarət İşçi Qrupu Şamaxı, Ağsu və İsmayıllı rayonu ərazilərində baş verən zəlzələnin sürüşmə sahələrinə təsirini öyrənib.

ONN media xəbər verir ki, bu barədə Ekologiya və Təbii Sərvətlər Nazirliyinin Milli Geoloji Kəşfiyyat Xidmətinin Geoloji Planalma Ekspedisiyasının rəisi, qərargah üzvü Əziz Qaralov məlumat verib.

Onun sözlərinə görə, İşçi Qrupu rayonların ərazisindəki klassik sürüşmə sahələrinə baxış keçirib:

“Şamaxı rayonu ərazisindəki ənənəvi sürüşmə sahəsi, Ağsu dolayları, Muğanlı sürüşmə sahəsi, Bakı-Şamaxı yolunun 106-cı kilometrliyi və digər sahələrdə aktivlik qeydə alınmayıb. Sürüşmə sahələri dəyişməyib və yeni sürüşmə sahələri yaranmayıb. Son günlər havaların yağışlı keçməsi ilə əlaqədar olaraq qrunt ağırlaşmaları müşahidə edilib. Lakin bu zəlzələdən sonra sürüşmə sahələrində aktivlik baş verməyib. Yaxın günlərdə də sürüşmə sahələrində hər hansı dəyişiklik olacağı gözlənilmir”.