Əfəndilər!

Məşhur alman filosofu Hegel demişdir: "İnsanların tarixdən aldıqları əsas dərs bundan ibarətdir ki, onlar ondan heç bir dərs ala bilmirlər." Bəli, şanlı tariximizə nəzər salsaq görərik ki, tarixdən dərs almadığımız üçün zaman-zaman məkrli düşmənlərimiz başımıza müsibətlər açıb, qardaşı-qardaşa qırdırıb.

Məkrli Türk düşmənləri tarixən çalışıblar ki, türk xalqı yaşadığı coğrafiyadan asılı olmayaraq öz milli mənliyini, milli kimliyini unutsun və bu istiqamətdə əllərindən gələni ediblər. Sizcə niyə?! Elə bu yerdə Türk dünyasının atası Mustafa Kamal Atatürkün qiymətli bir  kəlamını sizlərə xatırlatmağı borc bildim: "Bilək ki, milli mənliyini bilməyən millətlər, başqa millətlərə yem olarlar." Böyük Atamız bu sualın cavabını çox sərrast olaraq bizlərə və bizdən sonra gələn nəsillərə bildirib. Eyni zamanda ümummilli lider Heydər Əliyevin "Tarix həmişə hər şeyi öz yerinə qoyur" kəlamını xatırlatmaq istəyirdim. Bəli, bu gün artıq tarix hər şeyi öz yerinə qoyur. Bizlərin isə bundan sonra tariximizin bizə yaşatdığı faciələrdən dərs çıxararaq ağıl, təmkin və böyük əzmlə dədə nəsihətlərinə istinadən hər an dədə kökə bağlı vahid VƏTƏN naminə çalışmalıyıq. Bu şərəfli yolda heç kimin səhv etmyə haqqı yoxdur. Əsrlərdir gördük ki, zamanında etdiyimiz səhvlər, biz Türklərə çox ağır nəticələr verdi. Lakin sarsılmadıq, əzilmədik və milli kimliyimizdən - dədə kökdən ayrılmadıq. Bu yerdə milli azadlıq ruhunu daşıyaraq rus imperiyasına qarşı mübarizə aparan Əbülfəz Elçibəyin sözlərini xatırladım: " Sən Türk olduğunu unutsan da, düşman əsla unutmaz!" Əfəndilər! Bunu əsla unutmayın! Və əlbəttə ki, dədəmiz Bilgə Xaqanın nəsihətini unutmadıq: "Ey Türk milləti, titrə və özünə dön, sən özünə dönəndə böyük olursan!!!" Elə bütün bu dədə nəsihətlərə, türk törəsinə sadiq olan müzəffər  Ali Baş Komandan cənab İlham Heydər oğlunun "Bizim başqa ailəmiz yoxdur. Bizim ailəmiz Türk dünyasıdır" bəyanatı da əbəs deyil!

Əfəndilər! 

Beləliklə, tarixini unutma!

Utanc tariximizdən! 03.06.1989-cu il, Axısqa Türklərinə qarşı törədilən Fərqanə Faciəsinin ildönümüdür!

Tarixdən bəllidir ki, məkrli TÜRK düşmənləri daima qardaşlar arasına fitnə salıb.Əfsuslar olsun ki, zaman-zaman bu fitnəyə elə özümüz də alət olmuşuq. Növbəti belə fitnə 1989- cu ilin bu günündə canımızdan bir parça olan axısqalı qardaşlarımıza  öz əlimizlə vuruldu! Tarix gələcəkdə faciələrin yaşanmaması, fitnəkara fürsət verilməməsi üçün yaddaşlarımızda qalmalı və gələcək nəsllərə ötürülməlidir.

Yeri gəlmişkən bir məsələni  qeyd  etmək  istəyirəm. Faciənin 30 illiyində  dəyərli qardaşımız, Azərbaycanda yaşayan Axısqa Türkləri VATAN İctimai Birliyinin Sədri İsmayıl Rəhimov Azərbaycan xalqına təşəkkür edəndə dəyərli qardaşımıza yazdığım cavabdan bir hissəni xatırladıram: " ... Bu ağır gündə Azərbaycan xalqına təşəkkür edirsiniz. Var olun. Amma qardaşa qardaşının yanında olduğu üçün təşəkkür düşməz. Bu qardaşlıq borcudur. Bu borcu Azərbaycan yerinə yetirməli idi,onu da yetirdi..."

O, faciəli günlərdə həlak olan qardaşlarımıza Allahdan rəhmət diləyirəm. Ruhları şad olsun. Başın sağ olsun, TURAN!