“Aprel-2016: Şəhid ailələrinə dəstək” İctimai Birliyi millət vəkili Qənirə Paşayevanın rəhbərlik etdiyi “Avrasiya Beynəlxalq Araşdırmalar İnstitutu” İctimai Birliyi ilə birlikdə Sumqayıt şəhərindəki Dənizkənarı bulvarda yerləşən “Turan” istirahət mərkəzində Azərbaycan Xalq Cümhuriyyətinin 100-cü ildönümünə və Uşaqların Beynəlxalq Müdafiəsi Gününə həsr olunmuş “Vətən bizə əmanət” adlı tədbir keçirib. ONN media xəbər verir ki, tanınmış jurnalist Fəxriyyə Lilparın aparıcılığı ilə keçirilən tədbirdə 2016-cı ilin aprel və 2017-ci ilin fevral ayında vətən uğrunda şəhid olmuş qəhrəmanların övladlarının şənlənməsi üçün respublika uşaq özfəaliyyət kollektivləri, uşaq idman klubları, məktəblilər öz bacarıqlarını nümayiş etdiriblər.

Tanınmış incəsənət ustalarının çıxışlarınıda Vətəni tərənnüm edən mahnılar oxuyublar. Uşaqlar üçün intellektual-əyləncəli oyunlar təşkil olunub.

“Aprel-2016: Şəhid ailələrinə dəstək” İctimai Birliyin təsisçiləri Aida Eyvazlı və Sevinc Alızadə, Milli Məclisin deputatı, “Avrasiya Beynəlxalq Araşdırmalar İnstitutu” İctimai Birliyinin sədri Qənirə Paşayeva, Səbail rayon İcra hakimiyyətinin müavini Xalidə Bayramova, “Regional huquqi ve iqtisadi maarifləndirmə”Ictimai Birliyinin sədri Arzu Bağırova tədbirin məramı və məqsədi haqqında tədbir iştirakçılarına ətraflı məlumat veriblər. Çıxış edənlər dövlətin uşaqlara olan himayəsindən və qayğısından danışıblar. “Azman holdinq”in dəstək verdiyi bayram tədbirində uşaqlara xatirə hədiyyələri təqdim edilib.