Bu parlament seçkisi sələflərindən onunla fərqləndi ki, növbədənkənar keçirildi. Bir də bəzi namizədlərin  təbliğat-təşviqat günlərində nənələrlə görüşüb əllərini öpməsi ilə bağlı görüntülər  diqqəti cəlb etdi. Oxşar tərəfi isə seçkidən sonra yenə də insanların müəllimləri söyməsi ilə müşaiyət olunan hirs-hikkələrinin mətbuatda, sosial şəbəkələrdə baş alıb getməsi oldu. Yenə də saxtakarlıq müəllimlərin əli ilə nümayiş olundu, yenə də  seçki günü xoş olmayan bütün olaylar öyrətmən adına yazıldı.  Bu, olduqca acınacaqlı və olduqca ağrılı bir haldı. Ötən seçkinin "qəhrəmanı" olan Əfruz müəllim hələ yaddaşlardan silinməyib, ara-sıra gündəmə gəlir, sosial şəbəkələrdə tez-tez xatırlanır. Amma  bu dəfəki "müəllimlər", deyəsən, Əfruz  müəllimin atasına rəhmət oxutdular. Bu, ayrı məsələ, sözümün canı isə başqadı...

Üç gündü sosial mediyada müəllimlər təhqir olunur. Onların haqqında kim necə istəyir, ürəyindən nə keçir yazır, xoş olmayan ifadələr işlədir. Cəmiyyətdə sanki,  müəllimə qarşı bir səlib yürüşü başlayıb. Ölkədəki bütün seçki məntəqələrində baş verən  saxtakarlıqların hamısını onların "ayağına" yazırlar. Bəzilərini başa düşmək olur, bəzilərini isə həzm etmək mümkün deyil. Dünən facebookda diqqətimi cəlb edən bir yazı ürəyimi ağrıtdı. Hüsniyyə Məhərrəmova adlı televiziya aparıcısının əxlaqsız statusunu dəyişmədən, olduğu kimi  yazıram: "İndi başa düşürəm niyə "bəy" sözünü "mƏllim" sözü ilə əvəzlədilər. Bu gün gördüklərimdən anladım ki, "mƏllim"- yaltağ, binamus, prostitutka sözlərinin sinonimidi".

Heç xoş deyil.  Bu fikrin sahibi görəsən müəllimdən dərs almayıbmı? Müəllim qarşısında oturub ona imtahan verməyibmi? Müəllim şərəfinin alçaldılması üçün ürəyinin qapılarını nədən bu qədər geniş açıb? Ümid edirəm ki, bu sualların cavabını verə biləcək qədər düşüncəyə sahibdi. Saxta insanları, şərəfsiz adamları bütün peşələrdən olanların arasında tapmaq mümkündü. Beləsi televiziyada daha çoxdu bəlkə də. Onların efirdəki naqis davranışları hər kəsin gözünü ağrıdır, əsəbini tərpədir. Hüsniyyə Məhərrəmova bu qədər cəsarət sahibidirsə, onların haqqında da etikaya sığmayan  eyni sözləri yazsın, ya da elə birbaşa efirdən söyləsin. Nə yaza, nə də söyləyə bilər. Buna onun "həmkar dostluğu" imkan verməz. Onun gücü ancaq müəllimə çatar. O müəllimə ki, Hüsniyyənin cəmiyyətdə tutduğu bu günkü mövqe birbaşa ona  bağlıdı. O müəllimə ki, efirdə şou göstərməz, əxlaqsız hərəkətləri ilə gündəmə gəlməz, amma sinif otağında şagird qarşısında bilik nümayiş etdirər, əxlaq sərgiləyər.

***

Hüsniyyənin təhqir etdiyi müəllim bütün zamanlarda cəmiyyətin özəyi olub, insan yetişdirib. Hüsniyyə və onun kimilər müəllimliyin  şərəfini anlamazlar. Bir - iki müəllimin naqisliyini bütünlükdə həmin peşə sahiblərinin adına yazmaq özü naqislikdi. Hüsniyyə iki ali məktəbin diplominu alıb, incəsənətlə bağlı universitetlərdə oxuyub. Televiziyada əsasən şou verilişlərin aparıcısıdı. Şou proqramlarda aparıcının"ağzının kəndiri olmur", davranışı çərçivəyə sığmır. Bəlkə elə ona  görə də çəkinmədən, utanmadan müəllim haqqında əxlaqsız söz deməyi özünə haqq bilib. Görünən o ki,  iki ali məktəbin diplomuna sahib olsa da, müəllimlərinin dərsini öyrənməyib, öyrətmənlərinin şərəfindən bir şey götürməyib. Yoxsa nə olmuş ki?!  Hüsniyyə Məhərrəmova da Azərbaycan qadınıdı, anadı, üstəlik də televiziya aparıcısıdı, insanların gözü önündə olan bir adamdı. Sadaladığım bu parametrlərdə rolu olan müəllim haqqında nədən bu qədər hirs-hikkə ilə yazsın? Bəlkə Hüsniyyənin müəllimləri ona insanlığın, əxlaqın, etikanın dərslərini öyrətməyiblər. Nədən, əcaba?!

"Müəllim kimdi, həyatımızdakı  rolu nədən ibarətdi, vəzifəsi nədi?" kimi məsələlərə  geniş toxunmayacam. Çünki bunları hər kəs bilir, Hüsniyyə Məhərrəmovaya da aydındı, xatırlatmağa gərək yoxdu. Amma "müəllim müqəddəsdi" deyimini yazmamaqdan vaz keçə bilmirəm. Bu, doğrudan  da  belədi. Müəllim bütün  dövrlərdə peyğəmbər, imam  qədər hörmətli olub, qarşısında  səcdə ediləcək qədər şərəfli ad daşıyıb. Müəllim adının məsuliyyətini ləyaqətlə daşıyanlar insanlığın zəkasına işıq salıblar. Dünyanın hər yerində müəllimlik peşəsi  digərlərindən üstündü, başqa sənətlərin fövqündə dayanır. Bircə cümlə ilə deyim ki, Azərbycanda da  yaşlı və orta nəsil  üçün müəllim Allah qədər gözəl idi.

Nə yazıq ki, Allah qədər gözəl olan MÜƏLLİMi bu gün çirkinləşdiriblər. Onların bəzi nümayəndələrini siyasi oyunların alətinə çeviriblər. Seçki məntəqələrində üzə çıxan saxtakarlığın birbaşa onların adına yazılmasını təmin ediblər. Məşhur frazada deyildiyi kimi, müəllimlərin günahı nə? Hər kəs iradəli, ədalətli ola bilməz ki?! Seçki məntəqələrində məsuliyyət daşıyan müəllimlərin hamısına saxtakar damğası vurmaq  doğru deyil. Bəs, niyə onlardan da danışmırlar? Məlum... insan xisləti elədir ki, onun gözü neqativi daha tez görür. Çoxluğun kölgəsində nöqtə boyda boy göstərən  azlığa isə Hüsniyyə kimiləri əxlasızlıq damğası vurmağa tələsirlər. Onların hirs-hikkəsi şərəfli yol  keçən, Azərbaycan cəmiyyətinin özəyi olan və onun üst pilləsində yer tutacağı halda, ortadan da aşağı mərtəbədə oturdulan müəllimin şərəfini ayaq altına almamalıdı.

Heç bir hirs-hikkə  kimsəyə haqq vermir ki, MÜƏLLİM  haqqında əxlaqsız söz işlətsin.../olaylar