Böyük Britaniyada "meymunçiçəyi" kimi tanınan mpox virusunun daha əvvəl müşahidə olunmayan rekombinant (qarışıq genetik tərkibli) növü müəyyən edilib.
ONN media  xəbər verir ki, bu barədə ölkənin Səhiyyə Təhlükəsizliyi Agentliyi (UKHSA) məlumat yayıb.
Mütəxəssislərin açıqlamasına görə, yeni variant iki fərqli genetik xəttin xüsusiyyətlərini özündə birləşdirir. Daha ağır gedişatla əlaqələndirilən "Clade Ib" və daha yüngül simptomlarla müşahidə olunan "Clade IIb" alt növlərinə məxsus genetik materialın bu virusda bir arada olduğu bildirilib.
Mpox infeksiyası əsasən yaxın fiziki təmas, xüsusilə də yoluxmuş şəxsin dəri lezyonları ilə təmas nəticəsində yayılır. Virus həmçinin yoluxmuş şəxslərin geyimləri, yataq dəsti kimi əşyalar vasitəsilə və uzunmüddətli yaxın ünsiyyət zamanı ötürülə bilər.
Xəstəliyin ilkin mərhələsi çox vaxt qripə bənzər simptomlarla başlayır: qızdırma, baş və əzələ ağrıları, halsızlıq, bel ağrıları. Daha sonra isə bədənin müxtəlif nahiyələrində qabarcıqlı səpgilər, yaralar və ya sulu lezyonlar yaranır.
UKHSA virusun genetik dəyişikliklərə məruz qalmasının təbii proses olduğunu vurğulayıb. Ekspertlər xəstəliyin yüngül keçdiyi hallar olsa da, bəzi qruplarda ağır fəsadlar yarada biləcəyini xatırladır. Buna görə də yüksək risk qrupunda olan şəxslərin peyvənd olunması xüsusi tövsiyə edilir.
Elm adamları hesab edir ki, yeni rekombinant variant virusun qlobal miqyasda dövriyyədə olduğunu və təkamül prosesinin davam etdiyini göstərir. Bu səbəbdən yalnız peyvənd deyil, eyni zamanda ciddi gigiyena qaydalarına riayət edilməsi, riskli davranışlardan çəkinmə və ictimai maarifləndirmə tədbirləri vacib sayılır.
UKHSA bildirib ki, yeni variantın yoluxuculuğu və klinik təsirinin dəyişib-dəyişmədiyi hazırda diqqətlə izlənilir.