Son günlər Dövlət Gömrük Komitəsinə məxsus “Smart Customs” sisteminə daxil olmada problemlər yaranıb.

Bununla bağlı bir sıra vətəndaşlar sosial şəbəkə hesablarında narazılıqlarını ifadə edib.

Fiziki şəxslər tərəfindən xarici ölkədən Azərbaycana idxal olunan məhsulların bəyanı üçün yaradılan sistemə girişdə problemlərin yaranması, sistemin avtomatik çıxış verməsi və bunun da vətəndaşların xarici sifarişlərinin bəyanında çətinliklər yaratdığı iddia olunur.

Həmçinin artıq mayın 1-dən etibarən sözügedən sistemə giriş üçün mobil nömrə deyil, videozəng vasitəsilə kimliyin təsdiqlənməsinin tələb olunacağı bildirilir.

Məsələ ilə bağlı Dövlət Gömrük Komitəsindən “Ölkə.Az”a bildirildi ki, “Smart Customs” sistemində hər hansı problem qeydə alınmayıb. Sistemə daxilolma isə “ASAN Login” vasitəsilə aparılır və burada yaranan hər hansı bir hal “ASAN Xidmət”lə bağlıdır.

“ASAN Xidmət”dən isə sorğumuza cavab olaraq bildirildi ki, hazırda “ASAN Login” ilə bağlı sistemdə hər hansı problem yoxdur. 

Lakin qurum “ASAN Login”də qeydiyyat şərtlərinin dəyişəcəyini də təsdiqləyib. Belə ki, mayın 1-dən etibarən sözügedən sistemdə qeydiyyatın yalnız videoqeydiyyat üsulu ilə mümkün olacağı bildirilir.

Bu da təbii olaraq bir sıra dövlət saytları kimi “Smart Customs”a daxil olmaq istəyən vətəndaşların qeydiyyatında fərqliliyin olacağını göstərir.

Qeyd edək ki, qurum tərəfindən videoqeydiyyatın vətəndaşların informasiyalarının təhlükəsizliyi baxımından önəm kəsb etdiyi bildirilir.