Bu gün səhər saatlarında "Ağ çiçəyim"in Xalqlar Dostluğu Metrostansiyası yaxınlığında yerləşən mağazası yanıb.

Ətrafdakıların dediyinə görə, yanğın qısaqapanma nəticəsində baş verib. Yanğını görən vətəndaşlar hadisə ilə bağlı "112" xidmətinə zəng ediblər.

"Ağ Çiçəyim" gül mağazasının Elşən adlı reklam meneceri musavat.com-a bunu təsdiqlədi.

Bildirdi ki, yanğın hadisəsi qısaqapanma nəticəsində baş verib:" Təqribən saat 06:00 radələrində yanğın başlayıb. İlkin baxış zamanı bizə yanğının kondisionerin nasazlığı səbəbindən baş verdiyi deyildi. Mağazanın dam hissəsindən başlayan yanğın aşağıya doğru yayılmağa başlayıb. Mansardda olan gülə aid əşyalar yanıb. Yanğın zamanı güllərə ziyan dəyməyib. Ətrafdakıların köməyi ilə içəridəki mallar çölə daşınıb".

Xatırladaq ki, Fövqəladə Hallar Nazirliyi yanğınla bağlı məlumat yayıb. Məlumatda deyilir ki, Nizami rayonunda ümumi sahəsi 70 m² olan birmərtəbəli mağazanın mansardasının yanar konstruksiyaları, şüşə pambıq üzlüyü və mansardaya yığılan əşyalar 70 m² sahədə yanıb. Mağazanın qalan hissəsi yanğından mühafizə olunub. Yanğın söndürülüb.