İranda hava hücumundan müdafiə sistemləri tərəfindən “yanlışlıqla” raketlə vurulan Ukrayna Hava Yollarına aid “Boeing 737” tipli təyyarənin “qara qutu”su Fransaya göndəriləcək. ONN media xəbər verir ki, bu barədə İRNA-ya İranın Mülki Aviasiya Təşkilatının qəzalar üzrə idarəsinin baş direktoru Həsən Rzayifər deyib. O bildirib ki, “qara qutu”nun yaddaşını oxumaq üçün İranın kifayət qədər imkanları yoxdur: “Kanada, Fransa və ABŞ kimi ölkələrdən “qara qutu”dakı bilgilərin oxunması üçün lazımi cihazları İrana göndərmələrini tələb etdik. Amma bu ölkələr təklifi rədd etdilər. “Qara qutu”nun dünyadakı bitərəf və sayılıb-seçilən laboratoriyalardan birində oxunması üçün Ukrayna, İsveç, Britaniya, Kanada və ABŞ kimi ölkələrdən birinə göndərilməsinə qərar verildi. Son olaraq Fransa üzərində dayanıldı. Bu 5 ölkə də “qara qutu”nun kodlarının Fransada açılmasına razı oldu”.