Suraxanı rayonu Əmircan qəsəbəsində yerləşən XIV əsrə aid Nizaməddin məscidinin ətrafı zibildən təmizlənib. ONN media xəbər verir ki, bunu  açıqlamasında Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin mətbuat katibi Fariz Hüseynli deyib. O bildirib ki, hazırda Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin əməkdaşları ərazidədir: “Abidənin ətrafına tökülən zibillər ərazidən yığışdırılır. Bir müddətdir ki, ətrafda yaşayan sakinlər həmin əraziyə zibil atırlar. Abidənin qarşısındakı zibillər bir neçə dəfə təmizlənib, sakinlərə də xəbərdarlıq olunub. Belə halların təkrarlanmaması üçün müvafiq dövlət orqanlarına da müraciət olunacaq. Bir daha vətəndaşlarımızdan xahiş edirik ki, belə hallara yol verməsinlər. Abidələri qorumaq, onlara zərər yetirməmək hər bir vətəndaşın borcudur”. Qeyd edək ki, bu gün paytaxtın Suraxanı rayonunun Əmircan kəndində yerləşən və 14-cü əsrə aid Nizaməddin məscidinin baxımsız vəziyyətdə olduğu və zibilliyə çevrildiyini əks etdirən fotolar yayılıb.(kult.az)