Uşaq nikahlarının sayı son 10 il ərzində 10 dəfə aşağı düşüb. ONN media  bildirir ki, bu barədə Axar.az-a Ailə, Qadın və Uşaq Problemləri üzrə Dövlət Komitəsinin İnformasiya və analitik araşdırmalar şöbəsinin müdiri Elgün Səfərov 1 İyun - Uşaqların Beynəlxalq Müdafiəsi günü ilə bağlı danışarkən bildirib. “Yalnız bir gün deyil, hər gün uşaqların günüdür. Azərbaycanda bütün sahələrdə uşaq hüquqlarının təmin edilməsi istiqamətində mühüm siyasət aparılır. Təəssüf ki, mənfi nəticələrlə də üzləşirik. Bütün dünya ölkələrində olduğu kimi Azərbaycanda da uşaqların intiharı hadisəsi, ailədə azyaşlılara qarşı zorakılıq faktları, orta təhsil müəssilərində uşaqların bir-birinə qarşı zorakılığı, o cümlədən erkən yaşda uşaqların nikaha cəlb edilməsi qeydə alınır. Buna baxmayaraq, müsbət haldır ki, son 10 il ərzində Azərbaycanda uşaq nikahlarının sayı 10 dəfə aşağı düşüb: yəni 4 mindən 350-360-a düşüb”, - E.Səfərov qeyd edib. Pandemiya ilə əlaqədar olaraq, həssas kateqoriyalı uşaqlarla bağlı keçirilən tədbirlərdə məhdudiyyətlər var. Lakin Komitə tərəfindən hazırda həmin uşaqlara onlayn psixoloji və sosial yardım göstərilir, aztəminatlı ailələr mobil telefon və kompüterlə təmin edilir. Pandemiya dövründə məişət zorakılığına qarşı onlayn yardım məqsədilə ilk dəfə Komitə tərəfindən 860 “Qaynar xətt”i yaradıldı. Qurum rəsmisi bildirib ki, 2 iyun 2020-ci il tarixdə Prezident İlham Əliyev tərəfindən Azərbaycan tarixində ilk dəfə olaraq “Azərbaycan Respublikasının Uşaqlara dair 2020–2030-cu illər üçün Strategiyası” haqqında Sərəncam, həmçinin “Uşaqlara dair Strategiyanın həyata keçirilməsi üzrə 2020–2025-ci illər üçün Fəaliyyət Planı” imzalanıb: “Bütün nazirliklər və komitələr tərəfindən hazırda bu sərəncamlara əsasən, uşaqların səhiyyə, idman sahəsində inkişafı, asudə vaxlarının səmərəli keçirilməsi, yaradıcılıq imkanlarının artırılması, yeni texnologiya ilə təmin edilməsi işləri həyata keçirilir”.