Sentyabrın 24-də AMEA Rəyasət Heyətində “Turkish Aerospace” şirkətinin  nümayəndələri ilə görüş keçirilib. Məqsəd Azərbaycan Milli Elmlər Akademiyası və “Turkish Aerospace” şirkəti arasında texniki elmlər üzrə birgə fəaliyyətə dair müzakirələr aparmaq və əməkdaşlıq perspektivlərini müzakirə etməkdir.

AMEA -dan ONN media -ya bildiriblər ki, görüşdə çıxış edən AMEA-nın vitse-prezidenti, akademik İbrahim Quliyev AMEA və “Turkish Aerospace” şirkəti arasında texniki elmlər istiqamətində birgə tədqiqatların yerinə yetirilməsinin məqsədəuyğun olduğunu vurğulayıb. Akademik bu sahədə kadr və təcrübə mübadiləsinin aparılmasının zəruriliyini qeyd edib.

Sonra “Turkish Aerospace” şirkətinin Strateji və texnologiya üzrə idarəetmə rəhbəri, professor Fahrettin Öztürk çıxış edərək bildirib ki, qeyd olunan istiqamətlərdə birgə əməkdaşlıq kompleks araşdırmaların aparılmasına, müxtəlif layihələrin həyata keçirilməsinə geniş imkanlar yaradacaq.

Daha sonra AMEA ilə “Turkish Aerospace” şirkəti arasında birgə fəaliyyətə dair sənədin imzalanması ilə bağlı fikir mübadiləsi aparılıb.

Görüşdə həmçinin AMEA Rəyasət Heyəti aparatının Elm və təhsil idarəsinin rəisi, AMEA-nın müxbir üzvü Əminağa Sadıqov, AMEA-nın Strateji Araşdırmalar Mərkəzinin rəhbəri, siyasi elmlər üzrə elmlər doktoru Fətəli Abdullayev, AMEA Rəyasət Heyəti aparatının Beynəlxalq əlaqələr idarəsinin rəisi, biologiya üzrə fəlsəfə doktoru Esmira Əlirzayeva, “Turkish Aerospace” şirkətinin Korporativ marketinq və kommunikasiya şöbəsinin müdiri Tamer Özmen, Korporativ marketinq və kommunikasiya şöbəsinin regional meneceri Mehmet Gökan Keskin iştirak ediblər.