Ukrayna Nazirlər Kabinetində Dövlət Maliyyə Xidmətinin rəisi Roman Nəsirovun tutduğu vəzifədən azad edilməsi haqqında qərar qəbul olunub.  

ONN media xəbər verir ki, bu barədə “İnterfaks-Ukrayna”ya məlumat yayıb.

Sözügedən qərarın hökumətin bugünkü iclasında qəbul olunduğu bildirilir.

“Biz dövlət komissiyasına Nəsirovun vəzifədən kənarlaşdırılması ilə bağlı təqdimat göndərmişik. Bu gün qərar qəbul olunacaq”, – deyə ölkənin baş naziri Vladimir Qroysman hökumət iclasında bildirib.

Qeyd edək ki, Ukrayna antikorrupsiya bürosu Nəsirovu vəzifə səlahiyyətlərindən sui-istifadə etməkdə və dövlətə 2 milyard qriven (73 milyon dollar) ziyan vurmaqda şübhəli bilir.  Ötən ilin martın 3-də Nazirlər Kabineti Nəsirovun vəzifəsinin icrasından uzaqlaşdırılması barədə tapşırıq verib. Dekabrın 7-dən isə məhkəmə onun işinə baxmağa başlayıb.