Rusiya Ukrayna münaqişəsi davam edərkən qlobal qəhrəmana çevrilmək yolunda olan Ukrayna prezidenti Vladimir Zelenskinin siyasi karyerasına başlamazdan əvvəl çəkildiyi “Xalqın xidmətçisi” serialı dünyanın bir çox ölkəsində nümayiş etdirilir. 

ONN media xəbər verir ki, 2015-ci ildə ekranlaşdırılan “Xalqın xidmətçisi” serialında müəllimlik edərkən təsadüfən dövlət başçısı obrazını canlandıran Zelenskinin rolu 2019-cu il seçkilərində gerçəkləşib.

Zelenskinin əsasını qoyduğu “Kvartal 95 Studio” adlı prodüser şirkəti tərəfindən çəkilmiş serialın yayımını “Eccho Rights” şirkəti öz üzərinə götürüb. Şirkətinin direktoru Nikola Söderlund bildirib ki, son günlər filmin yayımı ilə bağlı satışlar xeyli artıb.

Ukraynada çox sevilən və 3 mövsüm nümayiş etdirilən serial daha sonra həddindən artıq maraq doğurduğu üçün bədii film kimi çəkilib.

Qeyd edək ki, İngiltərədə yayımlanan "Kanal 4" serialın ölkədə nümayiş hüququnu satın aldığını və "Xalqın xidmətçisi"nin bazar günləri nümayiş olunacağını açıqlayıb.

Eccho Rights Yunanıstanın ANT 1 və Rumıniyanın PRO telekanalları ilə Yaxın Şərqdə MBC ilə müqavilə imzaladığını və serialın Bolqarıstan, Moldova, Estoniya, Fransa, Finlandiya və Gürcüstan televiziyalarında da yayımlanacağını açıqlayıb. Serialın ABŞ-da yayım hüququnu kimin aldığı hələlik dəqiqləşdirilməyib.