Zəngəzur Cəmiyyətləri İctimai Birliyinin sədri Hacı Nərimanoğlunun "Zəngəzur: 100 sual, 100 cavab" kitabı nəşr edilib. Elmi-populyar nəşrdə arxiv materiallarından, müəllifin  Zəngəzurun tarixinə dair kitablarında, elmi-publisistik məqalələrində istinad etdiyi mənbələrdən istifadə olunmaqla bölgənin tarixinə dair 100 sual cavablandırılıb. Kitabda Vətənimizin dilbər guşəsi olan Zəngəzurun tarixi xəritələri, təbiəti, abidələri və görkəmli şəxsiyyətlərinin 100 fotosu da yer alıb. Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə “QHT Nəşriyyatı”nda işıq üzü görən kitabın nəşrində məqsəd bu torpaqların qədim dövrlərdən Azərbaycan xalqına mənsub olduğunu faktlarla ictimaiyyətə çatdırmaq, vətəndaşlarımızın elmi-tarixi, humanitar biliklərini artırmaq, maariflənməsinə yardımçı olmaq, itirilmiş torpaqlarımıza sahiblik hisslərini, xalqımızın dədə-baba yurdlarımıza qayıdış ruhunu yüksəltməkdir. Kitab tədqiqatçılar, tarixçilər, müəllim və tələbələr, geniş oxucu auditoriyası üçün nəzərdə tutulub və zengezur.com saytında yerləşdirilib (http://zengezur.com/KITABLAR/Zengezur-kitab-1.pdf). Nəşrin elmi redaktoru, Azərbaycan Universitetinin İctimai elmlər kafedrasının müdiri, tarix  üzrə elmlər doktoru, professor Qabil Əliyev kitaba rəyində xüsusi vurğulayıb ki, bu vəsait  Azərbaycan Prezidenti İlham Əliyevin müvəqqəti itirilmiş tarixi torpaqlarımız olan İrəvan və Zəngəzurun Azərbaycana məxsus olmasını sübut edən əsərlərin yazılması, tarixi gerçəkliyin üzə çıxarılıb yayılması, əsl həqiqətlərin təbliği, bu günkü, gələcək nəsillərə çatdırılması barədə  tövsiyələrinə   uyğun hazırlanıb. Namiq QƏDİMOĞLU, “Xalq qəzeti”