İnternetə qoşulmanın dövlət tərəfindən ciddi tənzimləndiyi Kubada sakinlərə smartfon vasitəsilə internetə daxil olmaq üçün icazə verilib.

ONN media xəbər verir ki, ilk olaraq dövlət mətbuat qurumlarında çalışan jurnalistlər bu imkana yiyələniblər.

Ada dövlətində internetə qoşulma uzun müddət məhdud olub. Yaxın vaxtlaradək kubalılar yalnız dövlət tərəfindən nəzarət olunan saytlara daxil ola bilirdilər, internetə tam çıxış yalnız turistlər üçün mehmanxanalarda əlçatan idi. 2018-ci ilin aprelində Miqel Dias-Kanelin hakimiyyətə gəlişi ilə siyasət dəyişib. O, əvvəllər demişdi ki, azad internet kubalılara iqtisadiyyatı möhkəmləndirməyə və "inqilabı qorumağa" imkan verəcək.

Yerli bazarda inhisarçı olan "ETECSA" telekommunikasiya şirkəti bəzi müştərilərə, əsasən özəl firma və səfirliklərə ötən ilin dekabrında mobil planlar almaq üçün icazə verib. İlin sonunadək "ETECSA"nın bütün müştərilərinin (təxminən 5 milyon nəfər, yəni Kuba əhalisinin təxminən yarısı) mobil internetdən istifadəsi planlaşdırılır.

Bundan başqa, xidmətin qiymətinin baha olması kubalıları narahat edə bilər. "Wi-Fi" nöqtələrinə qoşulma qiyməti 1 saat üçün 1 dollardır, halbuki ölkədə orta əməkhaqqı təxminən 30 dollar təşkil edir.