24 fevral tarixdə "Xocalının səsi" qəzetinin və Yaloba kənd Tarix-Diyarşünaslıq Muzeyinin birgə təşkilatçılığı ilə Gəncə şəhəri ərazisində məcburi köçkünlər üçün salınmış 600 ailəlik qəsəbədə vətənpərvərlik ruhunda film nümayiş etdirilib. 

"Xocalının səsi" qəzetindən ONN media -ya verilən məlumata görə, əvvəlcə qəsəbədə ucaldılmış "Ana harayı" abidəsinə qərənfillər düzülüb. Şəhidlərimizə Allahdan rəhmət dilənib.

Qarabağ müharibəsinə həsr olunmuş "Fəryad" filmini şagirdlər diqqətlə izləyiblər. Sonda  "Xocalının səsi" qəzetinin redaktoru, “Azərbaycan Respublikası Dağlıq Qarabağ bölgəsinin Azərbaycanlı İcması” İctimai Birliyinin idarə heyətinin üzvü Qalib Bəyməmmədoğlu şagirdlərə filmin çəkilişi və aktyorları haqqında  məlumat verib. O, bildirib ki, ekran əsəri Qarabağ müharibəsində döyüşən əsgərlərdən birinin başına gətirilən əhvalatdan bəhs edir. Filmi nümayiş etdirməyin əsas məğzinin Azərbaycan xalqının başına gətirilən faciələrin unudulmaması olduğu şagirdlərin diqqətinə çatdırıb. Qalib Bəyməmmədoğlu düşmən üzərində qələbə eldə etmək üçün həmrəy olmağımızın vacibliyini vurğulayıb.