Azərbaycan Respublikasının mədəniyyət naziri Əbülfəs Qarayev Rusiya Federasiyasına rəsmi səfəri çərçivəsində 22 sentyabr tarixində Moskva Hökumətinin naziri, Moskva Şəhər Mədəniyyət Departamentinin başçısı Aleksandr Kibovski ilə görüşmüşdür.

Mədəniyyət Nazirliyindən ONN media -ya verilən məlumata görə, görüş çərçivəsində Azərbaycan Respublikası və Rusiya Federasiyası arasında mədəniyyət sahəsində ikiillik tədbirlər planının hazırlanması və bir sıra digər məsələlər müzakirə edilmişdir.

Müzakirələr zamanı təhsil müəssisələri arasında kardlar mübadiləsinin həyata keçirilməsi, rejissorların müştərək qastrol səfərlərinin təşkil olunması, o cümlədən, kitabxana sahəsində Moskvada tətbiq olunan ən son texnologiyaların Bakıda da tətbiq olunması ilə bağlı imkanlarına baxılması, beynəlxalq festivallarda müştərək iştirak, Azərbaycan bəstəkarlarının əsərlərinin Moskva teatr repertuarlarına əlavə edilməsi, müştərək tamaşaların qoyulmasının və Moskvanın hər hansı bir teatrında bir həftəlik “virtual pəncərənin” təşkil olunması, qarşılıqlı sərgilərin keçirilməsi,  arxeologiya sahəsində birgə fəaliyyətin genişləndirilməsi məsələlər barədə fikir mübadiləsi aparılmışdır.

Görüşdə Azərbaycan Respublikasının Rusiya Federasiyasındakı Fövqəladə və Səlahiyyətli Səfiri Polad Bülbüloğlu iştirak etmişdir.